Sekoly Sabata - Sabbath School | Fanantenana ho Anao

NY FANOMEZAM-PAHASOAVAN'NY FAMINANIANA

FAMPIDIRANA

Ny Fanomezam-pahasoavan'ny Faminaniana

Nanomboka nahatakatra bebe kokoa ny fahaizan’ny zazakely amin’ny fianarana teny ny mpahay siansa momba ny ati-doha (neuroscientists). Rehefa enim-bolana monja ny zazakely iray, dia efa afaka mamantatra sy mahatakatra ireo feo mandrafitra ny teny anglisy, na ireo teny avy amin’ireo fiteny tenenina mihoatra ny 7 000 maneran-tany. Raha ampahafantarina azy ny fiteny faharoa, dia afaka mianatra izany fiteny izany koa izy.

Mandritra io vanim-potoana io, dia toy ny misy varavarana ara-tsaina mistery misokatra ao amin’ny sain’ny zazakely, ka ahafahany manavaka ireo feo 40 eo ho eo izay matetika mandrafitra ny fitenin-drazany, amin’ireo feo 800 samihafa izay azony tsapain-tanana hatramin’ny nahaterahany. Saingy misy fepetra iray: tsy maintsy iresahana ny zazakely. Azo lazaina hoe lesona voalohany amin’ny feo sy fiteny ho an’ny zaza vao teraka izany.

Nahoana Andriamanitra no namorona antsika hanana izany fahaizana mahatalanjona izany amin’ny fandrenesana sy fianarana teny, raha tsy nikasa ny hiresaka amintsika Izy?

Mazava ho azy fa fanontaniana mitaky valiny efa fantatra izany. Satria hoy ny Baiboly:

“Andriamanitra, izay niteny tamin’ny razantsika fahiny, tamin’ny fotoana maro sy tamin’ny fomba maro, tamin’ny alalan’ny mpaminany, dia efa niteny tamintsika amin’izao andro farany izao tamin’ny alalan’ny Zanany, izay notendreny ho mpandova ny zavatra rehetra, ary Izy koa no nanaovany izao tontolo izao.”
— Hebreo 1:1–2

Rehefa nandrava ny fifandraisana akaiky teo amin’i Adama sy Eva tamin’Andriamanitra ny fahotana, dia tsy nanary azy ireo Andriamanitra, ary tsy namela azy mivady lavo hirodana sy handrava ny tenany. Fa Izy mihitsy no nitady azy ireo, ka nanontany an’i Adama hoe:

“Aiza ianao?”
— Genesisy 3:9

Avy eo dia nanambara faminaniana momba ny fahatongavan’Ilay iray izay hamonjy izao tontolo izao amin’ny fahotana Izy (Gen. 3:15).

Hatramin’ny niandohany, dia teo amin’ny Edena, taorian’ny Fahalavoana, ny faminaniana dia nanandratra an’i Jesosy ary nitarika ireo mpanota ho Aminy, satria Izy irery ihany no fanantenan’izy ireo.

Ny zavatra hianarantsika amin’ity telovolana ity

Amin’ity telovolana ity dia hianarantsika ny momba ny fanomezam-pahasoavana momba ny faminaniana—izany fomba mahatalanjona noforonin’Andriamanitra izany mba hampitana ny sitrapony sy ny lalany amin’ny olombelona lavo, izay tsy afaka mifandray mivantana sy mifanatrika Aminy intsony.

Io fanomezana manokana avy amin’ny Fanahy Masina io dia voalaza misongadina ao amin’ny:

1 Korintiana 12
1 Korintiana 14
Efesiana 4
Romana 12

Ny Fanahy Masina no Mpizara lehibe izany sy ireo fanomezam-pahasoavana ara-panahy rehetra, satria:

“Fa izany rehetra izany dia ataon’ny Fanahy iray ihany, ka Izy no mizara amin’ny olona tsirairay avy araka izay sitrapony.”
— 1 Korintiana 12:11

Nandritra ny tantara, ireo olona nomena fanomezam-pahasoavana ara-panahy dia nampita hafatra avy amin’Andriamanitra mba hamerenana sy hanavaozana ny fifandraisan’ny olombelona amin’Andriamanitra, tahaka ny nataon’Andriamanitra tao Edena taorian’ny Fahalavoana.

Ahoana no iantsoan’Andriamanitra ny mpaminany?

Hianarantsika ny fomba iantsoan’Andriamanitra ny mpaminany, ary koa ny fomba ahafahantsika mitsapa sy mamantatra raha tena mpaminany marina izy ireo.

Ho hitantsika ihany koa:

ny fitoviana sy ny fahasamihafana misy eo amin’ireo mpaminany ao amin’ny Testamenta Taloha sy ireo ao amin’ny Testamenta Vaovao;
ny fomba fiasan’ny fanambarana (revelation) sy ny fitaomam-panahy (inspiration) eo amin’ny fiainan’ny mpaminany;
ny fomba samihafa ampiasain’Andriamanitra hampitana ny hafany.

Ny mpaminany sasany dia niteny, ny sasany kosa nanoratra, ary ny sasany dia nanao izany roa izany.

Hodinihintsika koa ireo fomba hafa ampiasain’Andriamanitra hifandraisana amin’ny olombelona, ny hevitr’izany, ary ireo fitahiana azo avy amin’ny fankatoavana ireo hafatra nampitain’ny mpaminany.

Ireo tanjona dimy lehibe ampiasan’Andriamanitra ny fanomezam-pahasoavana momba ny faminaniana

Mampiasa ny fanomezam-pahasoavana momba ny faminaniana Andriamanitra noho ny antony lehibe dimy:

1. Hampahafantatra ny Tenany, ny fahamarinany ary ny sitrapony amin’ny olombelona lavo.

2. Hanome fahatakarana sy torohevitra momba ireo zava-dehibe sy tranga hitranga.

3. Hanomana sy hampitaovana ny tenan’i Kristy—izany hoe ny Fiangonana—ho amin’ny iraka nampanaovina azy.

4. Hanome fampaherezana ara-panahy ho an’ireo mpanara-dia Azy.

5. Hamoha ny fon’ny mpanota sy hiantso azy ireo hibebaka.

Ankoatra izany, ny “fanahin’ny faminaniana” dia iray amin’ireo famantarana roa mampiavaka ny fiangonan’Andriamanitra sisa amin’ny andro farany (Apok. 12:17; 19:10).

Ny fanomezam-pahasoavana ho an’ny andro farany

Tena maniry ny hitarika soa aman-tsara ireo very hiverina any an-trano Andriamanitra, ka izany no mahatonga ny fanomezam-pahasoavana momba ny faminaniana mbola omena amin’ny andro farany koa (Joela 2:28–31).

Ny Advantista Mitandrina ny Andro Fahafito dia mino—ary manana antony matanjaka iorenan’izany finoana izany—fa Ellen G. White, izay iray tamin’ireo nanorina ny Fiangonana, dia nampiseho tamin’ny andron’ny maoderina ny fiasan’io fanomezam-pahasoavana momba ny faminaniana io.

Izany no antony, ankoatra ny fianarantsika ny fanomezam-pahasoavana momba ny faminaniana ao amin’ny Soratra Masina, dia isaky ny Zoma ihany koa no handinihantsika ny fizotry ny fiantsoana an’i Ellen G. White ho amin’ny asa fanompoana ara-paminaniana.

Isika amin’ny maha-Fiangonana antsika dia nomena izany fanomezana mahafinaritra izany. Koa ahoana no fomba tsara indrindra hampiasantsika azy?

Mila mihaino ny tenin’Andriamanitra isika

Eny, hatramin’ny fahazazantsika dia natao ho amin’ny fifandraisana amin’ny alalan’ny teny isika. Mila iresahana isika mba hivoatra sy hianatra.

Koa zava-dehibe tokoa ny mihaino izay lazain’ireo mpaminanin’Andriamanitra amintsika!

Momba ity Torolalana Fianarana Baiboly ity

Ity Torolalana Fianarana Baiboly ho an’ny Sekoly Sabata ho an’ny Olon-dehibe ity dia novokarin’ny ekipan’ny asa fanompoana ao amin’ny White Estate, izay any Silver Spring, Maryland.

Amin’ny alalan’ny fampahafantarana sy fizarana amin’izao tontolo izao ny asa fanompoana ara-paminanian’i Ellen G. White sy ireo asa sorany, ny Ellen G. White Estate, Inc. dia manohana ny iraka ampanaovina ny Fiangonana Advantista Mitandrina ny Andro Fahafito—dia ny hanandratra an’i Jesosy Kristy sy ny Teniny.

FANAFOHEZAN-TENY AMPIASAINA MANDRITRA NY FIANARANA

ARSH Adventist Review and Sabbath Herald

PM Patriarika sy Mpaninany/Patriarchs and Prophets, EGW

b. boky

CWE Counsels to Writers and Editors, EGW

RH Review and Herald, EGW

SL The Sanctified Life, EGW

SDABC Seventh-Day Adventist Bible Commentary

DIEM Madagasikara Dikanteny lombonana eto

ST The Signs of the Times, EGW

DHK Ny Dia ho eo amin'i Kristy/ Steps to Christ, EGW

TF Ny Tantaran'ny Fanavotana / The Story of Redemption, EGW

ed Edisiona

EGW Ellen Gould White

TFC Testimonies For the Church, EGW

TFM Torolalana ho amin'ny Fahaizamitantana/Counsels on Stewardship, EGW

Ev Evangelism, EGW

FK Fanabeazana Kristianina/Education, EGW

TlK Talohan'i Kristy

FLB The Faith I Live By, EGW

GAG God's Amazing Grace, EGW

Trk Taorian'i Kristy

HM Hery Mifanandrina/ The Great Controversy, EGW

TT Testamenta Taloha

TV Testamenta Vaovao

IFM Ilay Fitiavana Mandresy/ The Desire of Ages, EGW

t. takila

tt. takila roa fara fahakeliny

UL The Upward Look, EGW

L Letter, EGW

VM Vavolombelona Mahery/The Acts of

LU Lift Him Up, EGW

the Apostles, EGW

Ms Manuscript, EGW

Natontan'ny Trano Pirinty Advantista Soamanandrariny

BP 1134 Antananarivo 101 Lalam-pirenena mankany Toamasina (RN2), PK6 Tel. 037 37 11044-037 37 107 25-034 86 606 99 mail impriad@mea.adventist.mg

Voatolotra ara-dalana: DL: 860-D/03.26 Ny natonta: 14 800 isa

Lesona 8: NY FANAZAVANA IREO FAMINANIANA

Fampidirana - NY FANAZAVANA IREO FAMINANIANA

Hodinihina mandritra ny herinandro:

Mat. 5:17-48; 1 Kôr. 16:20; Mat. 4:1-11; Lio. 10:25-28; Lio. 24:25-27, 44-49.

Tsianjery

"Dia nanomboka hatramin'i Mosesy sy ny mpaminany rehetra Izy, ka nanambara taminy ny hevitry ny teny milaza Azy ao amin'ny Soratra Masina rehetra." - Lio. 24:27.

Taorian'ny fanomboana an'i Jesosy teo amin'ny hazo fijaliana sy ny fitsanganany tamin'ny maty, dia niseho tamin'ny mpianatra roa very fanantenana i Kristy. Samy niloa-bava izy ireo hoe: *"Nefa nantenainay fa Izy no Ilay efa hanavotra ny Isiraely."* – Lio. 24:21. Mesia iray hanafaka ny Jiosy amin'ny fifehezan'ny Romanina no nantenain'ireto mpianatra ireto. Io fiheveran-diso io sy ny fahadisoam-panantenana aterany dia vokatry ny fandikana vilana sy fanazavana tsy feno ny faminaniana momba ny Mesia ao amin'ny TT.

Novahan'i Kristy ny olan'ny tsy fahazoan-kevitr'ireo mpianatra roa ireo tamin'ny nanazavany ny Soratra Masina tamin'ny fomba fijery mivelatra sy feno kokoa (Lio. 24:25-27). Nanokatra ny mason'izy ireo ary nampangorakoraka ny fony ny fanazavan'i Kristy ny Soratra Masina (Lio. 24:31,32). Tatỳ aoriana dia niseho koa tamin'ny vondrona mpianatra maro kokoa tao Jerosalema i Jesosy, ary *"nanokatra ny sain'ireo Izy hahalala ny Soratra Masina"* – Lio. 24:45 (jereo koa ny Lio. 24:33, 36, 44-49).

Manasongadina ny vokatra tsara avy amin'ny fahatakarana marina ny teny faminaniana ireo fanandramana ireo. Ny fahatakarana diso ny faminaniana kosa dia mety hitarika ho amin'ny loza ara-panahy.

NY BAIBOLY NO MANAZAVA NY TENANY

Misy akony betsaka amin'ny fomba fanazavantsika ny Soratra Masina ireo hevitra mibahana mialoha ao an-tsaintsika. Ireo izay mihevitra ny Baiboly ho fitambarana antontan-taratasy tranainy fotsiny dia tsy mahita ny fifandraisana sy ny firindrana misy eo amin'ireo boky samihafa ao aminy. Fa raha raisintsika ho fitsipika fototra ny hoe: *"Izay soratra rehetra nomen'ny tsindrimandrin'Andriamanitra dia mahasoa"* - 2 Tim. 3:16, dia ho takatsika ny firaisan'ireo hafatra ao aminy ary ny Baiboly no havelantsika hanazava ny tenany.

Vakio ny Mat. 5:17-48. Ahoana no nanazavan'i Jesosy ireo fampianarana ao amin'ny TT voaresaka ao amin'ireo andininy ireo?

Ny famakiana maimaika ny Mat. 5:17-48 dia mety hahatonga ny olona hihevitra fa nosoloan'i Jesosy fampianarana vaovao ny fampianaran'ny TT. Kanefa, raha vakina amim-pitandremana kokoa izany, dia hita mazava fa nasehon'i Jesosy ny hevitra lalina sy ara-panahin'ireo fampianarana ao amin'ny TT. Amin'io heviny io dia tanterahiny ilay teny fikasana ao amin'ny Jer. 31:31-33, fa ao amin'ny fanekena vaovao dia hataon'Andriamanitra ao an-tsain'ny olony ny lalàny ary hosoratany ao am-pony (ampitahao amin'ny Heb. 8:8-10 sy ny Heb. 10:16).

Indraindray ny fanazavana ny andalan-teny iray dia hita ao anatin'ilay boky misy azy ihany. Ohatra, ao amin'ny Daniela toko faha-2 dia aseho aloha ny fanoritsoritana momba ny nofy saro-pantarin'i Nebokadnezara mpanjaka (Dan. 2:31-35), ary avy eo dia omena ny hevitr'ilay nofy (Dan. 2:36-45). Toy izany koa ao amin'ny Mat. 13; hitantsika ny fanoharana momba ilay mpamafy (Mat. 13:1-9), ary avy eo dia omen'i Jesosy ny fanazavana azy (Mat. 13:18-23).

Indraindray koa, mpaminany tatỳ aoriana no manazava ny hafatra iray. Ohatra, ny 2 Tant. 36:21,22 dia manamafy ny fahatanterahan'ilay faminaniana momba ny fitopolo taona, izay efa nambaran'i Jeremia ao amin'ny Jer. 25:11,12 sy ny Jer. 29:10. Ankoatra izany, maro amin'ireo tandindona sy aloka ao amin'ny TT no tanteraka tao amin'i Kristy, ary maro amin'ireo andalan-teny ao amin'ny TT no hazavaina ao amin'ny TV.

Hoy i Ellen G. White: "Filazantsara aseho amin'ny alalan'ny tandindona sy ny aloka ny TT. Ny TV kosa no fahatanterahan'izany. Samy ilaina avokoa izy roa tonta." — SIM, b. 2, t. 104. Eny tokoa, ny TV no tsindrimandry avy amin'Andriamanitra manazava ny TT.

Nahoana no mila mitandrina ny amin'ireo hevitra mibahana mialoha ao an-tsaintsika isika rehefa mandinika ny Baiboly? Izao kosa no zava-dehibe tokony ho ao an-tsaintsika: matoky aho fa tenin'Andriamanitra ny Baiboly, ary izy no tokony hanitsy ahy fa tsy izaho no hanitsy azy. Nahoana?

TONTOLON-KEVITRA ARA-TANTARA SY ARA-KOLONTSAINA

Vakio ny Isa. 65:17-20. Inona no hevitry ny hoe: any amin'ny lanitra vaovao sy tany vaovao dia "mbola zatovo ihany izay maty na dia efa zato taona aza"? - Isa. 65:20.

Raha esorina amin'ny tontolo ara-tantara nisy azy ny Isa. 65:20, dia mora ny mihevitra fa mbola hisy fahafatesana sy mpanota any amin'ny lanitra vaovao sy tany vaovao. Kanefa mifanohitra amin'ny teny fikasana nomen'i Isaia izany, hoe: *"Ho velona indray ny olonao izay efa maty"* - Isa. 26:19, ary koa: *"Hofoanany tsy hisy mandrakizay ny fahafatesana"* - Isa. 25:8 (Isa. 65:19).

Mazava loatra fa sarin-teny no ampiasaina ao amin'ny Isa. 65:20. Iza moa no mbola atao hoe zatovo nefa efa zato taona? Rehefa vakina ao anatin'ny tontolo ara-tantara misy azy ny Isa. 65:17-20, dia hita fa maneho amin'ny endrika tononkalo ny fitahiana homen'Andriamanitra ny firenen'ny Isiraely io andininy io, raha mitoetra ho mahatoky amin'ny fanekena izy ireo (ampitahao amin'ny Deo. 28). Tahaka an'i Jesosy ao amin'ny Mat. 24, izay mampifandray ny tranga akaiky amin'izay mbola hitranga any aoriana, dia manao toy izany koa i Isaia eto, mampiseho fa izay hitranga amin'izao fotoana izao dia santatry ny lanitra vaovao sy tany vaovao ho avy.

Ao amin'ny bokin'i Isaia dia tsy tranga any amin'ny hoavy fotsiny ny famoronana vaovao. Efa miseho ankehitriny izany amin'ny alalan'ny asa be voninahitra ataon'Andriamanitra amin'ny fanavotana sy famelan-keloka. Manambara io andininy io fa "dieny izao" aza, eo amin'ny fiainan'ny Isiraely, dia efa eo am-pandresena ny fahafatesana Andriamanitra. Aseho izany hevitra izany amin'ny alalan'ny teny fikasana momba ny fahalavan'ny andro iainana sy ny fanafoanana ny fahafatesan'ny zaza (*"na dia ny zaza minono any aza dia tsy ho fohy andro"* - Isa. 65:20). Izany rehetra izany dia tandindon'izay hitranga any am-parany avokoa.

Vakio ny 1 Kôr. 16:20. Ahoana no ampiharantsika io andininy io amin'izao andro sy kolontsaintsika izao?

Teo amin'ny kolontsaina grika tamin'ny andron'ny TV, ny fifampiarahabana teo amin'ny mpihavana sy ny mpinamana akaiky dia miaraka amin'ny fifanorohana. Nasain'i Paoly nampiharin'ny mpino kristianina izany fifampiarahabana feno hafanana sy fitiavana izany ao amin'ny Rôm. 16:16, 1 Kôr. 16:20, 2 Kôr. 13:12, ary ny 1 Tes. 5:26. Araka ny tontolon-kevitra eto, azontsika tsoahina avy amin'ireo andininy ireo ity foto-kevitra ara-Baiboly ity: tokony hifampiarahaba amim-pitiavana ny mpino, amin'ny fomba ahatsapan'ny tsirairay ho isan'ny ankohonan'Andriamanitra. Mety tsy ho azo ekena amin'ny kolontsaina sasany anefa ny fifanorohana, fa ny fifandraisan-tanana, ny fifamihinana, na ny fiankohofana amim-panajana no mety kokoa. Na inona na inona anefa kolontsaina misy, dia mampirisika antsika i Paoly mba hahatonga ny olona hahatsapa fa raisina amim-pitiavana ao amin'ny fiangonana izy ireo.

TONTOLON-KEVITRA ARA-LITERATIORA

Misy tantara fohy malaza notantarain'ny mpitoriteny iray momba ny lehilahy izay niatrika olana goavana teo amin'ny fiainany ka te hahafantatra ny sitrapon'Andriamanitra ho azy. Nosokafany ny Baiboliny ary anjoanjo fotsiny no nametrahany ny rantsan-tanany teo amin'ny Mat. 27:5, izay manao hoe: *"Dia niala izy ka lasa nandeha, dia nanao tady mody ka nananton-tena". Gaga tamin'izany andininy izany izy ka nanokatra ny Baiboliny toy izany indray mba hitady hafatra mampahery kokoa. Saingy teo amin'ny Lio. 10:37 ny rantsan-tanany no nijanona: *"Dia hoy Jesosy taminy: Mandehana hianao, ka mba manaova toy izany koa." Samy andininy marina ao amin'ny Soratra Masina avokoa ireo, saingy mila takarina ao anatin'ny tontolon-kevitra misy azy.

Eny tokoa, fanaon'ny maro ny manatsoaka andininy iray tsy ho ao anatin'ny tontolon-kevitra ara-literatiora misy azy, ary toy izany no anolanany ny hafatry ny Baiboly. Izany fomba izany dia manokatra ny lalana ho amin'ny fandikana vilana isan-karazany.

Vakio ny Gen. 3:1-5 sy ny Mat. 4:1-11. Ahoana no nanolanan'i Satana ny tenin'Andriamanitra tamin'ny tsy nampiasany azy tao anatin'ny tontolon-kevitra nisy azy?

Misy olona, na mahitsy fo aza, manolana ny hafatry ny Baiboly noho ny tsy fahalalany. Ny hafa kosa manao izany amin'ny nahim-pony, tahaka an'i Satana tamin'ireo tranga roa voalaza etsy ambony. Na ahoana na ahoana anefa, ny vokany dia ratsy mandrakariva.

Tao amin'ny Saha Edena (Gen. 3:1-5; ampitahao amin'ny Apôk. 12:9), dia niseho tamin'i Eva tamin'ny endriky ny menarana manintona sy mahaliana, izay afaka niteny tahaka ny olombelona i Satana. Nesorin'i Satana tamin'ny tontolon-keviny voalohany ny tenin'Andriamanitra, ary nataony ankapobeny ny hevitr'ilay fandrarana, avy eo, nohazavainy tamin'ny fomba feno fitaka izany.

Rehefa nentin'ny Fanahy Masina tany an'efitra i Jesosy (Mat. 4:1-11; Lio. 4:1-13), dia "niseho Taminy toy ny anjelin'ny mazava tany an'efitra nakana fanahy Azy i Satana, mba hamitaka an'i Kristy." — RH, 18 Desamba 1888. Naolan'i Satana ny Sal. 91:11-12 nandritra ny resaka nifanaovany tamin'i Kristy, mba hampisehoana fa hiaro na dia ireo izay minia mampidi-doza ny tenany aza Andriamanitra.

Manamafy ny fisian'ny fifanandrinana lehibe eo amin'ny tsara sy ny ratsy ny zava-nitranga tao Edena sy tany an'efitra, ary tafiditra amin'izany ny momba ny fanazavana ny Tenin'Andriamanitra, na ny teny voambara na ny voasoratra. Tokony hanampy antsika izany hahatsapa ny maha zava-dehibe ny fahatakarantsika tsara ireo andalan-teny ao amin'ny Baiboly, ao anatin'ny tontolon-kevitra misy azy.

Nahoana isika no tsy tokony hiezaka hanatsoaka ny teny tsy ho ao anatin'ny tontolon-kevitra misy azy mba hanohanana ny hevitsika, na marina toy inona aza ny hevitsika?

NY HEVITRY NY LAHATSORATRA

Ny Kristianina rehetra dia tokony hahatakatra ny Baiboly ho an'ny tenany manokana. Mazava tsara ny Baiboly mba hahafahan'ny olona rehetra mahatakatra ny lalam-pamonjena, nefa lalina koa ka saro-takarina na ho an'ny marani-tsaina indrindra aza. Harem-pahalalana tsy hita lany mitondra famonjena ny Soratra Masina, izay tsy mety ho voatrandraka tanteraka mihitsy.

Vakio ny Lio. 10:25-28. Misy olona milaza fa tsy mila hazavaina ny Baiboly. Raha marina izany, nahoana àry i Jesosy no nanontany an'ilay mpahay lalàna hoe: "Inona no voasoratra ao amin'ny Lalàna? Ahoana no fahazoanao azy?" – Lio. 10:26, DIEM.

Mba hahatakarana ny hevitry ny lahatsoratra iray, dia ilaina aloha ny mahatakatra ireo teny ampiasaina ao aminy, avy eo ny fomba ampiasana ireo teny ireo ao anatin'ny tontolon-kevitra ara-literatiora misy azy sy ao anatin'ny tontolon-kevitra ankapoben'ny Baiboly. Ilaina koa ny mandinika ny toe-javatra ara-tantara sy ara-kolontsaina misy azy, araka izay azontsika atao. Farany, ny fehin-kevitra tsoahintsika dia tsy maintsy mifandrindra tanteraka amin'ny fampianaran'ny Soratra Masina ankapobeny. Azontsika ampitomboina ny fahalalantsika amin'ny fampitahana ireo lohahevitra mitovy ao amin'ny Soratra Masina — tahaka ny fanao matetika amin'ireo Filazantsara efatra.

Ampitahao ny Mat. 5:43-48 sy ny Lio. 6:27-36. Ahoana no anampian'ny tontolon-kevitra misy ny Mat. 5:43-48 sy ilay andininy mifanindran-dalana aminy ao amin'ny Lio. 6:27-36 antsika hahatakatra bebe kokoa ny hevitry ny teny hoe "tanteraka" ao amin'ny Mat. 5:48?

Anisan'ny toetra manan-danja indrindra tokony hananan'izay manazava amim-pahatokiana ny Soratra Masina ny fandinihana izany amim-pitandremana sy fanetren-tena. Aoka tsy hohadinoina fa tsy misy olona mahalala tanteraka ny fahamarinana rehetra; samy mizaha ao amin'ny fitaratra isika ka tsy mahita marina.

Tokony hataontsika mandrakariva izay hahafantarana ny fampianarana tsy misy kilema (2 Tim. 4:1-5). Iray amin'ny fitsipika manan-danja tokony harahintsika ny mifantoka amin'izay efa takatsika tsara sy mazava amintsika. Eo no iaingantsika, ary matetika rehefa mandeha ny fotoana, dia hanampy antsika izany hahatakatra amin'ny hoavy ireo hevitra tsy mbola mazava amintsika ankehitriny. Hisy hatrany ny fanontaniana tsy voavaly raha tsy mbola tonga any amin'ny mandrakizay isika.

Saino ny fotoana izay tsy nahatakaranao zavatra iray ka tena nanelingelina anao izany, nefa tatỳ aoriana dia azonao tsara izany rehefa nohazavaina taminao. Ahoana no tokony hanampian'izany fanandramana izany anao hatoky an'Andriamanitra momba ireo zavatra ao amin'ny Teniny izay mbola tsy takatrao mazava ankehitriny?

FAMELABELARANA ARA-TSORATRA MASINA

Tokony hifantoka amin'ny tanjona roa lehibe ny fandinihantsika ny Baiboly: ny fitomboantsika ara-panahy sy ny fitarihana ny hafa ho amin'ny fifandraisana mahavonjy amin'i Jesosy. Nofaritan'i Kristy fa ny Kristianina marina dia izay tarihin'ny Fanahy Masina *"ho amin'ny marina rehetra"* - Jao. 16:13, mivelona amin'ny *"teny rehetra izay aloaky ny vavan'Andriamanitra"* - Mat. 4:4, ary mampianatra ny hafa hitandrina *"izay rehetra nandidiako anareo"*. - Mat. 28:20.

Vakio ny Lio. 4:16-30 sy ny Lio. 24:25-27, 44-49. Inona no azontsika ianarana avy amin'ny fomba nanazavan'i Kristy ny Soratra Masina eto?

I Jesosy Kristy no *"làlana sy fahamarinana ary fiainana"* – Jao. 14:6, tamin'izany andro izany sy ankehitriny ary ho mandrakizay. Ny toriteniny anefa dia niorina mafy tamin'ny Soratra Masina. Ohatra, voalaza ao amin'ny Mar. 1:14,15 hoe: *"Ary rehefa voasambotra Jaona, dia nankany Galilia Jesosy nitory ny filazantsaran'Andriamanitra ka nanao hoe: Efa tonga ny fotoana ka efa akaiky ny fanjakan'Andriamanitra; mibebaha hianareo ka minoa ny filazantsara."* Ilay hoe *"fotoana"* eto dia manondro mazava ny faminaniana ao amin'ny Dan. 9:24-27. Ao amin'ny Toriteny teo an-tendrombohitra (Mat. 5–7), dia nanonona ny Eks. 20:13 sy 14 i Jesosy (Mat. 5:21,27). Ao amin'ny Lio. 4 kosa, dia nanonona ny Isa. 61:1,2 Izy. Mpitoriteny nifototra tanteraka tamin'ny Baiboly i Jesosy.

Misy ohatra hafa koa ao amin'ny Asa 8. Milaza io toko io fa *"tonga tany Jerosalema (...) mba hivavaka"* ilay tandapa Etiopianina – Asa. 8:27, izay manambara fa nahafantatra ny fivavahana jiosy sy ny fomba amam-panaony sasany izy. Nananany koa aza ny dika mitovin'ny bokin'i Isaia, izay novakiny tamim-pahazotoana nandritra ny diany nody. Kanefa tsy takany ny hevitry ny faminaniana momba Ilay Mpanompo nivesatra ny fahotan'ny olona, ka nitady olona hanazava izany aminy izy.

Mampianatra antsika lesona manan-danja vitsivitsy izany fanandramana izany: voalohany, tsy voatery hahatonga fahatakarana tsara ny hevitry ny andininy ao amin'ny Soratra Masina ny famakiana izany fotsiny. Faharoa, rehefa mandinika ny Baiboly isika dia afaka, ary tokony, hifampianatra. Fahatelo, manana adidy manokana isika hizara amin'ny hafa ny hafatra marina avy ao amin'ny Baiboly.

Ny famelabelaran'i Filipo ny bokin'i Isaia sy ireo andalan-teny hafa ao amin'ny TT dia nitarika ilay tandapa ho amin'ny batisa (Asa. 8:35-39; ampitahao amin'ny Sal. 51:13). Tokony hanan-tanjona mitovy amin'izany koa ny famelabelarana ara-Soratra Masina ataontsika (jereo ny Jao. 17:17).

Na mila fanampiana aza isika indraindray mba hahatakatra ny hevitry ny andalan-teny sasany, nahoana no tsy maintsy resy lahatra ao an-tsaintsika isika momba izay inoantsika?

MAMAKY NY BOKIN'I ELLEN G. WHITE

Ahoana no tokony hamakiantsika ny asa soratr'i Ellen G. White? Misy torohevitra vitsivitsy ireto hanampy antsika hahatakatra sy hampihatra araka ny tokony ho izy ny hafatra nosoratany.

Voalohany, manàna toe-tsaina vontom-bavaka, fisainana miabo, ary saina misokatra, fa tsy toe-tsaina feno fisalasalana. Ny fisainantsika dia toy ny solomaso izay manome loko ny zavatra rehetra rentsika sy vakintsika ary hitantsika. Mila ny fitarihan'ny Fanahy Masina ny saintsika. Araka ny nambaran'i Ellen G. White hoe: *"Raha ny hanamarina ny fiheveran'ny tenanao no handinihanao ny Soratra Masina, dia tsy hahita ny fahamarinana na oviana na oviana ianao. Ataovy izay mba hahalalana izay lazain'ny Tompo."* – HF, t. 103. Toy izany koa no tokony ho fomba famakiana ny asa sorany.

Faharoa, diniho ny tontolon-kevitry ny lahatsoratra vakinao. Matetika no aorin'ny olona amin'ny fehezanteny iray na ampahan-dahatsoratra nesorina tao amin'ny tontolon-kevitra ara-tantara na ara-literatiora misy azy ny fahatakarany ny asa soratr'i Ellen G. White. Nanoratra toy izao izy: "Tsy maintsy dinihina tsara ny fotoana sy ny toerana." – SIM, b. 1, t. 57. Niteraka olana maro teo amin'ny mambran'ny fiangonana sasany, ary mbola miteraka olana maro mandraka ankehitriny, io tsy fiheverana ny tontolon-kevitra misy ny lahatsoratra io.

Fahatelo, mifantoha amin'ireo foto-kevitra lehibe. Inona no tian'i Ellen G. White hambara ao amin'ilay andalana? Ohatra, tamin'ny taona 1894 dia nanoratra ho an'ny mambra tao Battle Creek, Michigan, izy ka nanakiana ny fividianana bisikileta (Jereo ny TFC, b. 8, tt. 50–53). Ny foto-kevitra nampitainy dia tsy ny fandrarana ny bisikileta, fa ny fitantanana amim-pahendrena ny vola aman-karena nomen'Andriamanitra. (Tena lafo tokoa mantsy ny bisikileta tamin'izany andro izany).

Fahefatra, diniho izay rehetra nosoratan'i Ellen G. White momba ny lohahevitra iray. Diniho araka ny votoatin'ny fampianarany ankapobeny ny fanambarana iray izay toa manjavozavo na saro-takarina. Nalahelo i Ellen G. White fony fahavelony noho ny nampiasana ny asa sorany tamin'ny fomba feno fanararaotana: "Maro amin'ireo hafatra lazaina fa avy amin'ny rahavavy/anabavy White no ampiasaina mba handisoana ny tena heviny sy ny toetrany, mba hampisehoana azy ho manohana hevitra izay tsy mifanaraka amin'ny sainy sy ny fony akory." – SIM, b. 1, t. 44.

Farany, ataovy azo antoka fa i Ellen G. White tokoa no mpanoratra. Misy fanambarana maro aely izay lazaina fa avy aminy, nefa tsy azy akory. Ny fomba azo antoka indrindra hanamarinana izany dia ny fitadiavana ny loharano niaviany. Rehefa voamarina ny boky na ny lahatsoratra niaviany, dia azo dinihina araka ireo fitsipika voalaza etsy ambony izany.

Fanomezana sarobidy ho antsika ny asa soratr'i Ellen G. White, izay faminaniana. Zava-dehibe tokoa ny mamaky sy mahatakatra azy ireny araka ny tokony ho izy, satria afaka mitondra – ary tena mitondra - fitahiana lehibe ho an'ny olona an-tapitrisany maro izany. Mampalahelo raha ampiasaina amin'ny fomba diso na aolana ny heviny.